काठमाडौं। रोटरी क्लब अफ डिल्लीबजार र रोटर्याक्ट क्लब अफ डिल्लीबजारको संयुक्त आयोजनामा निःशुल्क स्वास्थ्य शिविर तथा रक्तदान कार्यक्रम सम्पन्न भएको छ। सन् २०२६ अक्टोबर १०, शनिबारका दिन काठमाडौंको मैतीदेवीस्थित सूर्योदय सेकेन्डरी बोर्डिङ स्कुलमा आयोजित कार्यक्रममा करिब २०० जनाले स्वास्थ्य परीक्षण सेवा लिएका छन् भने १० प्रिन्ट रगत संकलन भएको छ।
कार्यक्रमको संयोजन रोटरी क्लब अफ डिल्लीबजारका पूर्वअध्यक्ष सागरनिधि तिवारीले गरेका थिए। कार्यक्रममा रोटरी क्लब अफ डिल्लीबजारका सचिव मनोज ब्याञ्जु, रोटर्याक्ट क्लब अफ डिल्लीबजारका अध्यक्ष सुस्मिता पण्डित लगायत रोटरी क्लबका पूर्वअध्यक्षहरू, रोटरियन, रोटरियनका जीवनसाथी (स्पाउस) तथा अन्य व्यक्तित्वहरूको उपस्थिति रहेको थियो।
कार्यक्रममा सहभागी सर्वसाधारणलाई विभिन्न स्वास्थ्य परीक्षण तथा परामर्श सेवा प्रदान गरिएको थियो। स्वास्थ्य परीक्षणमार्फत समुदायका नागरिकलाई आफ्नो स्वास्थ्य अवस्थाबारे जानकारी लिन सहयोग पुर्याउनुका साथै रोगको समयमै पहिचान र उपचारप्रति सचेत गराउने उद्देश्य राखिएको थियो। त्यसैगरी, रक्तदान कार्यक्रम मार्फत आवश्यकतामा रहेका बिरामीलाई रगत उपलब्ध गराउन सहयोग पुर्याउने लक्ष्य लिइएको थियो।
कार्यक्रमलाई सफल बनाउन तिलगंगा आँखा अस्पताल, हिमाल हस्पिटल, अल्फा डायग्नोस्टिक सेन्टर लगायत स्वास्थ्य संस्थाहरूले सहयोग गरेका थिए। स्वास्थ्य क्षेत्रमा कार्यरत विभिन्न संस्थाको सहकार्यले समुदायस्तरमा स्वास्थ्य सेवा विस्तार गर्न र जनचेतना अभिवृद्धि गर्न महत्त्वपूर्ण योगदान पुर्याएको आयोजकले जनाएको छ।
रोटरी क्लब अफ डिल्लीबजारले स्थापना कालदेखि नै स्वास्थ्य, शिक्षा तथा सामुदायिक विकासका क्षेत्रमा विभिन्न सामाजिक तथा सेवामूलक गतिविधि सञ्चालन गर्दै आएको छ। रोटर्याक्ट क्लबसँगको सहकार्यमा आयोजित यस कार्यक्रमले सामाजिक उत्तरदायित्व, मानवीय सेवा र सामुदायिक सहभागिताको महत्त्वलाई थप उजागर गरेको छ।
स्वास्थ्य परीक्षण र रक्तदानजस्ता सेवामूलक कार्यक्रमले नागरिकलाई स्वास्थ्यप्रति सचेत बनाउन, रक्तदान संस्कृतिको विकास गर्न तथा आवश्यकतामा रहेका व्यक्तिलाई सहयोग पुर्याउन महत्त्वपूर्ण भूमिका खेल्ने विश्वास गरिएको छ।
