काठमाडौ, २० फागुन। नेपाली कांग्रेसको १३ औं महाधिवेशन आजदेखि काठमाडौमा सुरु हुँदैछ । दिउँसो काठमाडौको खुलामन्चमा कांग्रेस कार्यवाहक सभापति रामचन्द्र पौडेलले १३औं महाधिवेशन उद्घाटन गर्ने कार्यक्रम छ । दिउँसो १ बजे भव्य समारोहबीच महाधिवेसनको उदघाटन गरिनेछ । ‘सुशीलको नेतृत्वमा बनायौं संविधान, समृद्ध राष्ट्र र निर्माण अब हाम्रो अभियान’ भन्ने मूल नारासाथ सुरु हुन लागेको महाधिवेसनले आगामि चार बर्षका लागि नयाँ नीति र नेतृेत्व दिनेछ ।
महाधिवेशनको उद्घाटनसत्रमा कांग्रेसले मोहन वैद्य नेतृत्वको नेकपा–माओवादीसहित व्यवस्थापिका संसदमा प्रतिनिधित्व गर्ने सबै राजनीतिक दललाई निमन्त्रणा गरेको छ । उद्घाटनमा सहभागी हुन विभिन्न देशका प्रतिनिधि काठमाडौं आइसकेका छन् ।
उदघाटनअघि विभिन्न ठाउँबाट साँस्कृतिक झाँकीसहित जुलुस निकालिनेछ । महाधिवेशनले आगामी चार वर्षका लागि नयाँ नेतृत्व चयनका साथै पार्टीले लिने नीति र कार्यक्रमसमेत टुंगो लगाउनेछ ।
फागुन २३ गते नयाँ नेतृत्व चयन गर्दै सम्पन्न हुने महाधिवेशनको बन्दसत्र भोलिदेखि भृकुटीमण्डपमा हुनेछ । नेतृत्वका लागि ८३ पदमा निर्वाचन हुनेछ । संविधान कार्यान्वयन र आर्थिक विकासलाई प्राथमिकतामा राखेर तयार गरेको नीति तथा कार्यक्रम भोलि बन्दसत्रमा पेस हुने जनाइएको छ ।
बन्दसत्रमा महामन्त्री प्रकाशमान सिंह र कृष्णप्रसाद सिटौलाको प्रतिवेदन, विधान संशोधन प्रस्ताव र कोषाध्यक्षको प्रतिवेदन पेस हुनेछ । बन्दसत्रमा पेस हुने सबै प्रतिवेदन केन्द्रीय समिति बैठकले सर्वसम्मतिले पारित गरिसकेको छ । ३ हजार १ सय ७० महाधिवेशन प्रतिनिधि सहभागी हुने महाधिवेशनमा २ सय ४० निर्वाचन क्षेत्रबाट २ हजार ८ सय ८० सहित १९ देशमा रहेका जनसम्पर्क समिति, भ्रातृ तथा शुभेच्छुक संगठनबाट प्रतिनिधि सहभागी हुनेछन्।
