काठमाण्डौ – नेपालमा थप १० जनामा कोरोना संक्रमण पुष्टि भएको छ । आइतबार नेपालगञ्जका ९ जना र वीरगन्जका १ गरी १० जनामा कोरोना संक्रमण पुष्टि भएको स्वास्थ्य मन्त्रालयका प्रवक्ता डा. विकास देवकोटाले जानकारी दिए ।
आज नेपालगन्जमा कोरोना संक्रमण देखिएका ९ जना ७ देखि ५८ वर्ष उमेर समूहका रहेका छन् । कोरोना संक्रमित हुने अर्का वीरगञ्ज -२ छपकैयाका एक ३६ वर्षीय पुरुष रहेका छन् । यस अघि सोही स्थानका एक ४६ वर्षीय पुरुषमा पनि संक्रमण पुष्टि भएको थियो । यो सँगै हालसम्म कोरोना संक्रमितको संख्या ६९ पुगेको छ ।
नेपालमा हालसम्म कोरोना संक्रमण देखिएको मध्ये १५ जनाले स्वास्थ लाभ गरेका छन् । निको भइसकेका एक पुरुषमा आज पुन: संक्रमण देखिएपछि स्वास्थ्यलाभ गर्नेको संख्या घटेर १५ पुगेको हो ।
